Ásprent Stíll og Prentstofan Stell sameinast

Rekstur Prentstofunnar Stell á Akureyri hefur verið sameinaður Ásprenti Stíl ehf. og hyggur hið sameinaða fyrirtæki á enn frekari sókn á prentmarkaði hér á landi. Prentstofan Stell verður rekin áfram sem sjálfstæð eining og mun innan tíðar flytjast í stærra húsnæði í Kaupangi. Með kaupunum styrkist samkeppnisstaða Ásprents Stíls gagnvart stærstu prentsmiðjunum á höfuðborgarsvæðinu enn frekar. Hallur Jónas Stefánsson stofnaði Prentstofuna Stell árið 1989. Hún mun innan tíðar flytja sig um set í stærra húsnæði, en verður þó áfram til húsa í verslunarmiðstöðinni Kaupangi. Stell hefur sérhæft sig í stafrænni prentun af ýmsu tagi og á næstunni verður ráðist í kaup á margvíslegum tækjabúnaði til að auka þjónustu prentstofunnar á því sviði enn frekar.

Hallur verður hluthafi í Ásprenti Stíl ehf. og mun gegna starfi framleiðslustjóra stafrænna prentlausna. Samstarfsfólk hans hjá Prentstofunni Stell mun starfa áfram hjá hinu sameinaða fyrirtæki.

Hefur alla burði til aukinnar sóknar

“Frá því ég stofnaði Stell fyrir 17 árum og til dagsins í dag hefur margt breyst. Fyrstu 3 árin  var fyrirtækið rekið sem stimplagerð en árið 1992 bættist  við ljósritun plasthúðun og innbindingar. Tækniframfarir á þessum tíma hafa  verið miklar og í dag er ljósritun orðin stafræn og mikill meirihluti verkefna er prentaður beint út úr tölvu í ótrúlega miklum gæðum. Ég tel rétt að auka sérhæfingu Stell í stafrænni prentun enn frekar og sameining við Ásprent Stíl er að mínu mati mikilvægt skref í þá átt að veita viðskiptavinum mínum enn betri þjónustu á þessu sviði en áður,” segir Hallur.

Bjarni Hafþór Helgason, stjórnarformaður Ásprents Stíls, segir þetta mikilvægt skref í að hefja öfluga sókn í starfsemi félagsins.  “Við munum kappkosta að fá aukin verkefni í framhaldinu, bæði frá fyrirtækjum hér norðan heiða og ekki síður annars staðar af landinu. Ásprent Stíll hefur nú alla burði til aukinnar sóknar á prentmarkaði á landsvísu og er í því sambandi sérstaklega horft til höfuðborgarsvæðisins,” segir Bjarni Hafþór, en hann er framkvæmdastjóri Hildings sem er stærsti eignaraðili Ásprents Stíls.

G. Ómar Pétursson, framkvæmdastjóri Ásprents Stíls ehf., segist fagna þessari nýjustu viðbót í fyrirtækið. “Við teljum mikla möguleika felast í sameiningu fyrirtækjanna, þótt starfsstöðvarnar verði áfram tvær. Nú getum við tekið að okkur prentverkefni af öllum stærðargráðum og unnið þau hraðar og hagkvæmar en áður, sem auðvitað kemur viðskiptavinum okkar til góða. Innan vébanda Ásprents Stíls er nú offsetprentsmiðja af stærstu gerð, stafræn prentsmiðja, límmiðaprentun, hönnunardeild og merkingadeild þannig að okkur eru allir vegir færir í þeirri samkeppni sem ríkir á markaðnum.”

Hildingur ehf., á tæplega 60% hlut í Ásprenti Stíl ehf. en Einar Árnason prentsmiðjustjóri, G. Ómar Pétursson framkvæmdastjóri og Hallur Jónas Stefánsson, framleiðslustjóri stafrænna prentlausna, eiga samtals ríflega 40% hlut í fyrirtækinu.