Undirritaður hefur verið samstarfssamningur milli Starfsendurhæfingar Norðurlands ( SN ) og Vinnumálastofnunar um þróun þjálfunarvinnustaðar
á Akureyri.
Heimastöð þjálfunarvinnusstaðarins er að Glerárgötu 36 og hefst starfsemin á næstu dögum. Gerður hefur verið leigusamningur við
KEA sem styrkir verkefnið með myndarlegum hætti í gegnum húsaleigu og húsbúnað sem samtals er metið á þriðju milljón
króna. Einnig hefur Vinnumarkaðsráð á Norðurlandi eystra ákveðið að styrkja starfssemina um 800 þúsund krónur í formi
tækjakaupa.
Vinnumálastofnun kaupir af SN tíu þjálfunarpláss fyrir einstaklinga sem hafa verið í atvinnuleit lengur en í eitt ár. Hér er um
að ræða tilraunaverkefni og nýjung í starfssemi Starfsendurhæfingarinnar. Áhersla er lögð á að byggja upp samvinnu við
vinnumarkaðinn fyrir þá einstaklinga sem eru í þjálfun hjá SN og þurfa á stuðningi að halda til að komast í vinnu
á ný. Þjálfunin fer fram í tilbúnum aðstæðum í heimastöð. Einnig er ætlunin að tengja hana við vinnumarkaðinn
í formi starfskynninga og starfsþjálfunar. Á meðan á þjálfuninni stendur er þátttakandinn virkur í atvinnuleit. Með
þessu verkefni á að spornað við þeim ófyrirsjáanlegu afleiðingum sem langtíma atvinnuleysi hefur í för með sér.
Hugmyndin er sótt til sambærilegra þjálfunarvinnustaða í Evrópu og hugmyndafræðin einkum mótuð eftir hollenskum og slóvenskum
fyrirmyndum. Starfsendurhæfing Norðurlands hefur verið í samvinnu við samstarfsaðila í Hollandi og í Slóveníu á síðustu sex
árum í gegn um Evrópuverkefni og er sá þjálfunarvinnustaður sem nú lítur dagsins ljós ein afurða þess samstarfs.
![](/static/files/Myndir/thjalfunarbudir_320.jpg)
Við undirritun samnings talið frá vinstri.
Halldór Jóhannsson, framkvæmdastjóri KEA, Geirlaug G. Björnsdóttir, framkvæmdastjóri Starfsendurhæfingar Norðurlands, Soffía
Gísladóttir, fostöðumaður Vinnumálastofnunar á Akureyri og Gissur Pétursson, forstjóri Vinnumálstofnunar.