Fréttir

Aðalfundur KEA var haldinn í Verkmenntaskólanum á Akureyri á laugardaginn.  Auk hefðbundinna aðalfundarstarfa flutti Erlendur Hjaltason forstjóri Exista erindi á fundinum.  Ársskýrsla KEA 2006 er nú aðgengileg á heimasíðunni.

Rannsókna- og þróunarmiðstöð Háskólans á Akureyri hefur lagt mat á þjóðhagslega arðsemi og samfélagsleg áhrif af lagningu vegar yfir Kjöl, fyrir Norðurveg ehf. Niðurstöðurnar sýna að framkvæmdin er mjög arðbær og fellur vel að byggðaáætlun og samgönguáætlun stjórnvalda. Samfélagslegur ábati af framkvæmdinni er mikill eða 5,6 milljarðar króna. Ef veglagningin á sér stað í samdráttarskeiði verður ábatinn enn meiri eða tæpir sex milljarðar króna.

Aðalfundur KEA verður haldinn í Verkmenntaskólanum á Akureyri (Gryfjunni) laugardaginn 17. mars nk. kl. 10:00. Aðalfundarfulltrúar hafa verið kjörnir á deildarfundum félagsins en allir félagsmenn eiga rétt til setu á fundinum með málfrelsi og tillögurétt. Dagskrá: Venjuleg aðalfundarstörf Samþykktarbreytingar  

Samkvæmt samstæðuársreikningi félagsins fyrir árið 2006 sem stjórn hefur samþykkt var hagnaður félagsins 356 milljónir króna fyrir reiknaða skatta en 287 milljónir króna eftir reiknaða skatta.  Heildareignir félagsins í lok síðasta árs námu 5,4 milljörðum króna og var eigið fé félagsins á sama tímapunkti rúmir 4,5 milljarðar króna.  Eiginfjárhlutfall félagsins var 84%.  Félagið greiddi á árinu rúmar 40 milljónir króna í arð til félagsmanna. 

Norðurvegur ehf. stefnir að lagningu nýs vegar yfir Kjöl í einkaframkvæmd. Hluthafar eru nú þegar um 20 talsins og er um að ræða einstaklinga, fyrirtæki og sveitarfélög bæði á Norður- og Suðurlandi, en hlutur KEA er 25%. Stjórn félagsins skipa Halldór Jóhannsson framkvæmdastjóri KEA, Jóhannes Jónsson í Bónus, Eiður Gunnlaugsson framkvæmdastjóri Kjarnafæðis, Kjartan Ólafsson þingmaður Sjálfstæðisflokksins í Suðurkjördæmi og Gunnar Þorgeirsson formaður Sambands sveitarfélaga á Suðurlandi.

Gamla bögglageymslan, sem stendur við Kaupvangsstræti 6, hefur sett mikinn svip á Gilið og þar með bæjarmynd Akureyrar í heila öld.  Húsið var byggt sem sláturhús árið 1907 en auk þess var þar meðal annars rekið mjólkurbú, bögglageymsla, verslun o.fl.  Líkt og með önnur hús í Gilinu var það byggt upp í kringum starfssemi KEA og hefur alla tíð verið í eigu félagsins.

Saga Capital og Þekking gengu nýverið til samninga um alhliða þjónustu Þekkingar á tölvukerfum Saga Capital. Um er að ræða umfangsmikinn samning sem felur í sér rekstur, viðhald og hýsingu á öllum tölvu-, hugbúnaðar- og stýrikerfum hjá Saga Capital og aðstoð við notendur.

Föstudaginn 19 janúar var ný vefsíða Vikudags opnuð á vefslóðinni www.vikudagur.is . Vikudagur hefur til þessa ekki verið með sérstaka fréttavefsíðu, en stefnir að því að margfalda þjónustuna við lesendur sína með tilkomu frétta-og upplýsingavefsins. Blaðið og vefurinn munu vinna saman og veita heildstæða fréttaþjónustu þar sem vefur mun fylla upp í skörð sem blaðið skilur eftir og blaðið mun bæta inn í og fullkomna þá mynd sem fram kemur á vefnum.

Stefna hefur bætt við sig tveimur nýjum starfsmönnum. Það eru Valur Hauksson og Martha Dís Brandt.Valur er tölvunarfræðingur að mennt og verður að vinna við forritun hjá Stefnu. Martha er einnig tölvunarfræðingur og mun hlutverk hennar vera verkefnastjórnun og kennsla á vefumsjónarkerfi Stefnu, Moya. Valur og Martha eru bæði útskrifuð sem tölvunarfræðingar úr Háskólanum á Akureyri. Í dag starfa fimm tölvunarfræðingar frá HA í Stefnu.

Um helgina stóð yfir söfnun  á Akureyri þar sem fjármunum var safnað til styrktar Hjálparstarfs kirkjunnar.   KEA tók þátt í söfnunni og  færði Hjálparstarfi kirkjunnar 70 matarpoka, sem verða afhentir skjólstæðingum Hjálparstarfsins núna í aðdraganda jólanna.